لو قلتلك ان أفنان كانت من أكثر الناس التزاماً في النادي، وفي نفس الوقت الناس حولها كانوا يسألوها: "أنتي كويسة؟ مريضة أو فيكي شي؟

اليوم احكيكم قصة نجاح أفنان.

كانت تتمرن وتاكل قليل ، وما تقدر تدخل النادي الا ماتاخذ كافيين.. بدون كافيين ماتقدر تتمرن.

دورتها منقطعة، وكل وجبة تاكلها معاها ذنب. لدرجة ان الناس كانوا يحسبوها مريضة.

وهي كانت تسمي هذا "التزام".

الشغلة اللي خلتني احكي قصتها، انها قصة تتكرر معاي كثير: «انا ملتزمة وجسمي مو راضي يتجاوب». واذا شفتي نفسك في سطر واحد منها، فاللي تعيشيه مو ضعف ارادة منك

وهنا بعد 4 شهور من التدريب :

الاعراض اللي مو أحد يربطها بالأكل

أفنان ما جتني تشتكي من وزنها. كانت تشتكي من شي أخطر بكثير: ما عندها طاقة تعيش يومها.

«الناس كانت تجي تقول لي: أفنان، أنتِ كويسة؟ عندك شي؟ صار لك شي؟ لدرجة كانوا يحسبوني عندي مرض.»

خلينا نوقف عند هالجملة. أفنان كانت تسوي كل الاشياء الصحية في اعتقادها: تتمرن، تاكل قليل، تنضبط. ومع ذلك الناس يشوفوا شخص مريض. بشرة تعبانة، وجه شاحب، وحضور مرهق.

جسمها كان يرسل الاشارة بوضوح، والناس لاحظتها، وهي كانت تسميها «التزام».

وعليها مشكلتين اضافية:

الدورة الشهرية منقطعة.

علاقة غير صحية مع الطعام ومبنية على الخوف، في العزايم ماتاخذ راحتها في الاكل وتفضل تاخذ وجباتها معاها وذنب مع كل لقمة،

ايش اللي كان يصير في جسمها؟

لو انتي مو قادرة تتمرني الا بمنبهات، هذا مو «ما عندي همة». غالباً جسمك يقولك: ما عندي طاقة اصرف منها.

الـ Pre-Workout والكافيين ما يعطوك طاقة، هم يسلفوكي هيا. يرفعوا الادرينالين عشان تحسي انك قادرة، وخزان جسمك فاضي. والسلف هذا يتسدد بعدين: ارهاق، بشرة تعبانة، نوم مضطرب، وتزيدي الجرعة مع الوقت.

وجسمك في هالحالة يعيد ترتيب اولوياته:

اللي يتقلص اول

ليش

الهرمونات

جسمك يحس ان الظرف مو آمن ، فتنقطع الدورة

البشرة والشعر

آخر اولويات جسم يحس انه في مجاعة

القوة والاستشفاء

ما تقدري تبني عضل بدون طاقة كافية ومغذيات

المزاج والطاقة الذهنية

الدماغ عضو مكلف، بالتالي مافكي تفكري وتركيزك يكون معدوم

انقطاع الدورة او لخبطتها مو عرض بسيط. هو من أوضح العلامات اللي يصدرها جسمك ان اللي تسويه مو مستدام وجالس يضرك.

التغيير وكم اخذ فعلاً؟

أفنان لاحظت الفرق قبل ما تخلص الاربع اسابيع الاولى، وبدأ من مكان ما توقعته:

“من ثالث و رابع أسبوع بدأت ألاحظ يعني على نفسيتي اختلفت، مع أنها مدة مرة بسيطة… كنت مرتاحة أكثر”

١. الاكل تحول من تهديد الى وقود.

"كنت أقول لك: أنا مرة حاسة بالذنب بالأكل. بعدين كنتِ تحسّسيني إنه عادي، It's fine كلي، اخرجي مع صحباتك"

هنا ازلنا اول عائق قدام الالتزام: الذنب. اللي تحس بالذنب بعد كل وجبة ما تقدر تستمر على اي نظام

٢. قاعدة ٨٠/٢٠ هي الاداة اللي بقت معاها.

" ثمانين في المئة وعشرين في المئة… هذا الشي فرق معاي بمراحل مرة كبيرة، إلى اليوم وأنا ماشية عليها."

٨٠٪ من اكلك يخدم هدفك، و٢٠٪ يخدم حياتك: العزايم، الطلعات مع صحباتك. هذا مو تنازل انما هذا شرط الاستمرار. وقالت"إلى اليوم وأنا ماشية على هذا النظام" هي المقياس الحقيقي لنجاح اي برنامج.

٣. الاكل الصح استبدل الكافيين.

"انتبهت إنه أنا بدأت أرفع أوزاني، وبدأت أروح من غير مو أضطر آخذ Pre-Workout، وأحس إنه أنا عندي طاقة، أنا أقدر أسوي رياضة"

لاحظي رفعت اوزان اثقل وهي موقفة المنبهات. لو كان الـ Pre-Workout هو مصدر القوة.. ليش اوزانها كانت موقفة ؟

وخلينا نكون صادقين مع بعض في التوقيت: أفنان نفسها تفرق بين الاثنين. النفسية والطاقة تحسنوا خلال اسابيع، لكن شكل العضلات جا «بعد وقت». واي احد يوعدك بتغيير شكل جسمك في ٤ اسابيع، يبيعك نفس الوهم اللي ماوصلك لاي نتيجة. وانتظام الدورة لازم تتابعيه مع دكتورتك بالتوازي اذا احتجتي تدخل دوائي

الشهر كان يساوي شهور

التزام أفنان الاول كان شهر واحد.

«صح أنها كانت شهر في البداية، لكن الشهر كانت بالنسبة لي حقّت شهور قدام.»

الشهر ما كان قصير لأنه مكثف وبس، كان قصير لأن اللي تعلمته فيه بقي معاها بعد ما خلص. لين اليوم تطبق ٨٠/٢٠، ولين اليوم ما تحتاج كافين عشان تتمرن.

وهذا الفرق بين برنامج يعطيك نتيجة والله اعلم ممكن تكملي عليها او لا، وبرنامج يعطيك نظام تكملي عليه.

ايش تستفيدي من قصة أفنان؟

١. لو ما تقدري تتمرني بدون منبه، المشكلة في صحتك مو في همتك. الجسم المتغذي ما يحتاج منبه عشان يتحرك.

٢. اذا الناس بدأوا يسألوك «انتي بخير؟»، هذي مو مجاملة. هذي قراءة دقيقة لجسم شغال تحت ضغط. لا تسميه انضباط.

٣. اي نظام يمنعك تطلعي مع صديقاتك، السؤال فيه مو «هل ينتهي» السؤال «متى». ٨٠/٢٠ مو تساهل، هي الفرق بين نتيجة تدوم شهر ونتيجة تدوم سنين.

هل هذي حالتك؟

ما تقدري تتمرني بدون Pre-Workout او كافيين

تحسي بتعب مع انك “تسوي كل الاشياء الصح”

بشرتك تعبانة او وجهك شاحب دايماً

احد سألك مؤخراً اذا كنتِ مريضة

دورتك انقطعت او اضطربت

تحسي بذنب بعد كل وجبة

ترفضي تطلعي مع صديقاتك خوفاً على نظامك

ثلاث علامات او اكثر؟ جسمك مو عنيد، تحتاجي ترممي الايض تبعك

​