لو قلتلك ان اهدافك الصحية زي أبغا انقص خمسه كيلو، ابغا اجري في نصف ماراثون، ابا عضلات بطن مقسمة… ممكن تغير حياتك كلها لوعرفتي تحولي اهدافك قصيرة المدى لشيء ذو معنى أعمق، مستدام وملهم.
الشغلة اللي خلتني اكتب هذي المقالة بعد ماقريت مقالة مكتوب فيها ان مجال الصحة البدنية ( الأكل السليم والرياضة السليمة ) تمثل 16% فقط من نجاحك ووصلوك لهدفك
يعني اللي قدروا يحققوا اهدافهم ويعيشوا مع الجسد اللي يحلموا فيه قدروا ينجحوا فامور ثانية
بس قبلها اسالي نفسك سوال واحد.. هل دخولك للحياة الصحية بيخليكي أفضل؟ ولا بيخليكي أسوأ ؟
ليان كيف اسوا ؟ ما انا دخلت الحياة الصحية عشان اكون افضل.
لو سرتي تاكلي 800 سعرة وكنتي خايفه من الاكل.. اذا كنتي بتجهدي نفسك في التمرين بدون راحة..
كل هذا نتيجة لهوس النحف. جالسه تضحي بجوانب كثيرة من حياتك ( صحتك - تركيزك - طاقتك - سلامك النفسي ) مقابل هذا الهوس
هنا حساعدك تزدهري فجميع امور حياتك. بالمعنى الحرفي حقلك كيف دخولك للحياة الصحية حيخليكي شخص أفضل مو بس في صحتك وشكلك حتى في عملك في علاقاتك وفي معظم جوانب حياتك..
والدليل عملت مقابلة مع وحده من متدرباتي ذكرت فيها ان تحسين نمط اكلها خلى ابواب جديدة وفرص تنفتح لها، الموضوع مو صدفه وولا هوا سحر. لو سمعت اللقاء حتفهمي ليش “ قريب حنزل المقابلة”
طيب ايش المختلف ؟ كيف الشخص فعلا يقدر يوصل لهذي المرلحة؟
لو قدرتي تنقلي عقليتك من “تحدي التخسيس في 12 اسبوع” أو “ابا اخسر 10 كيلو قبل زواجي” ولا “عندي سفرية مهمة وابا انزل قبلها خمسة كيلو عشان شكلي في الصور يطلع حلو” إلى شيء ذو معنى حقيقي
طيب خلينا نكون صادقين مع بعض فعلا مسكتي دايت 12 اسبوع وخسرتي وزنك فيها.. لمن وقفتي ايش سار ؟ وزنك رجع اكثر مما كان صح ؟
بعد الزواج في السنه الثانية كيف حال صحتك ووزنك ؟ رجعوا غالبا بعد ال 10 كيلو اللي خسرتيها
التحدي الحقيقي
هل حتقدري تحافظي على وزنك او الهدف اللي وصلتيله ؟ بالضبط الصحة العميقة تخليكي تستمري للأبد
طيب سيبكي من وزنك، هل حاليا قادرة تعيشي بدون تانيب ضمير او حرمان او جوع ؟ بدون ماتحولي موضوع الرياضة والدايت لهوس او كانه وظيفة دوام كامل
بعد ماجلست مع سيدات اعمارهم فوق ال 40 دائما يقولوا حابه ارجع لنفسي القديمة زمان قبل 15 و 20 سنه قبل ما انشغل وانسى نفسي.
عارفة انه مؤلم لمن تتراجعي وتنتكسي لانك كنتي حاسة بالفخر وبتتصوري بكل ثقة تقولي انا كذا كان وزني وتتاملي صورك القديمة.. حاليا عندك شعور متواصل بالخجل ومنتي حاسه انك مرتاحة مع جسمك ونفسك
طيب لو قلتلك ان فيه طريقة تقدري تدربي فيها بصورة مستدامة، تتعلمي كيف تتطوري انتي كشخص - كشخصية وعقلية، كيف تحسني اتصالك مع نفسك كيف تتطوري فوظيفتك كيف تتميزي وتحسي انك فعلا حياتك بتتغير قبل ماجسمك وصحتك يتحسنوا ؟
طولت عليكي في المقدمة بس كان لازم تخشي في التفاصيل..
اول كنت اقول لايف ستايل وتطوير ذاتي بس بعدين حسيت فين السبايس لا اكيد الموضوع اكبر من كذا لكن بعد ما بحثت عن الموضوع طلع المسمى العلمي ليه هوا
التدريب من أجل الصحة العميقة.
يسير لمن تتناغم جميع أبعاد الصحة معاً، بدل التركيز على الجانب البدني فقط.
الموضوع مايتعلق فقط بالمظهر أو مستوى أدائك الرياضي.
يتعلق أيضاً بكيفية تفكيرك، وحلك للمشكلات، تفاعلك وتعاملك مع العالم من حولك.
التدريب من أجل الصحة العميقة حيساعدك مو بس توصلي لهدفك وفوقها وتحافظي عليه، لان المرا هذي ماحتمشي على نظام نفع مع غيرك حتبني لنفسك النظام اللي يناسبك انتي شخصيا والرحلة والطريق ماحتكون مملة زي زمان ومتعبة ومرهقة بالعكس حتكون ممتعة
خذيها قاعدة من كوتش ليان وافتكريها مني: كثير اشخاص يقولوا قلدوا الناجحين واتبعوا خطاهم، انا جاية اقلك استلهمي منهم بس لا تقلديهم لانهم بكل بساطة نجحوا في ظروفهم الخاصة.. الشخص الناجح بذاته لو رجعت الزمن لورا وقلتله يلا سوي نفس الامور اللي كنت تعملها عشان توصل لهدفك ممكن مايقدر لان ظروفه اختلفت عن ذاك الوقت، معقول خسارة الوزن لسيدة عمرها 20 سنه نفسها خسارة الوزن لسيدة عمرها 40 ؟ ( حتى لو هيا نفس السيدة ) في عمر ال 40 مسوولياتها زادت - حركتها قلت - عمليات ايضها وكتلتها العضلية مو هيا نفسها في عمر ال 20 وقيسوا عليها..
طيب عشان ما ازعلك وماتحسي الموضوع متعلق بس في العمر وحده عمرها 23 دوبها اتخرجت من الجامعة. ايام الجامعة كان عندها مرونة فوقتها وتتحرك كثير، كانت تختار صحباتها ومحطيها، تاكل وجباتها اللي كانت تحضرها في البيت وتاخذها الجامعة فكان التزامها باكلها ونمطها الصحي عالي. الان اول ما اتوظفت سار شغلها مكتبي 8 ساعات وهيا جالسة. جالسه حول زملاء العمل واللي مو هيا اختارتهم بالتالي مجبورة تتعايش مع افكارهم، يطلبوا من برا يحلوا كثير فسارت تحلي معاهم حكم انو الكل بيحلي حتى لو مهي مشتهيه الحلى اصلا
الاختلاف: ( حركتها قلت - اكلها زاد - وقتها سار ضيق )
هل وصولها لهدفها هوا نفسه لمن كانت تتحرك اكثر وعندها تحكم اكبر في وجباتها ومحيطها ؟
الرحلة هذي حتكتشفي فيها نفسك انتي… لايعني انو حاليا ماتقدر توصل لهدها لكن بكل بساطة اللي نفع معاها اول مو شرط ينفع معاها الان. الان جا وقت تلاقي طريق يناسب اسلوب حياتها الحالي وتعيد تشكيل اولوياتها ووقتها.
يلا ندخل في الصحة العميقة وهيا عبارة عن ايش..
الأبعاد الستة للصحة العميقة (Deep Health)
الصحة العميقة ماحتجيكي من ابرة وولا عملية تخسيس . انما ب
نظام غذائي متوازن من الأطعمة الطازجة والكاملة. ممارسة التمارين الكافية وبعدها تجي الراحة والاستشفاء . بعدها حتجي من هواء نقي وماء نظيف. واخيرا التواصل البشري الحقيقي والتعبير العاطفي.
هذا لو اتكلمنا عن الاساسيات.. لمن نجي للرفاهيات وهيا انك تعيشي لأجل هدف وبهجة وتخلي حياتك تعبر عنك
لمن تدربي لاجل صحتك العميقة ماحتركزي على نسبة الدهون في الجسم وفحوصات الدم، حتكوني واعية لطريقة تفكيرك، مشاعرك، شعورك،الطريقة اللي تتواصلي فيها مع الاخرين.
حتفهمي ان عادات الأكل ونمط حياتك ياثر على كل جوانب حياتك
الأبعاد الستة للصحة العميقة هي: البدنية، العاطفية، الذهنية، الوجودية، الاجتماعية/العلاقاتية، والبيئية
مجالات صحية متداخلة ومتصلة بقوة
مشاعرنا تؤثر على طريقة أكلنا ( الأكل العاطفي )، التحدي الغذائي رقم 1 لكثير من السيدات).
الأشخاص اللي عندهم عائلات داعمة، أو علاقات قوية في الجيم او اصحاب رايضيين ، أو مجتمعات لياقة بدنية (مثل مجموعات الجري أو ركوب الدراجات) يكونوا أكثر التزاماً بحضور تمارينهم.
أو الأشخاص اللي يملكوهدف واضح، أو قناعات ذاتية تشجع على الأنشطة الصحية، أو رغبة في تحويل المعاناة او الالم اللي مروا فيه فحياتهم إلى لدافع يخليهم يشتغلوا اكثر.. ولمن نتكلم عن هذي النقطة اتوقع اغلبنا عنده نقاط الم لو ركزنا فيها ممكن تعطينا دافع للتطوير
في البداية حتكون سامة. لكن مع الوقت حتنسي مصدر الالم وحتكملي في اللي انتي فيه عشان نفسك وصحتك. ممكن يكون دافعك ابا اغير صحتي عشان الشخص اللي جرحني فشكلي حاباه يشوفني ويشوف قد ايش نجحت. ممكن حصل موقف ندمتي عليه او ضيعتي فيه وقتك وحاسه الان بالالم.. فرغي هذا الوجع في صالة الحديد وانك تكوني افضل،
ممكن يكون دافعك شي جميل.. ابا اكون افضل عشان احفادي لمن يكبروا ابا العب معاهم. ابا اسافر واغامر. ابا يكون عندي حياة اجتماعية حتى وانا فعمر ال 70
هذول الاشخاص هما أكثر قدرة في الحفاظ على حماسهم والنجاح.
جوهر التدريب من أجل الصحة العميقة. كل بُعد من أبعاد الصحة العميقة تاثر على سلوكيات الأكل وممارسة الرياضة.
خلينا نشوف احد النماذج الواقعية :
- المثال 1: لاعبة رفع اثقال محترفة ومصابة في معصم اليد. ماتقدر تتمرن بشكل صحيح وتحس بالالم كل مرا تشيل فيها وزن، بالتالي بطلت تتمرن، ولياقتها البدنية اتراجعت. ( الصحة البدنية ) ولكن بسبب هذا الموقف :
- حاسبه بالاكتئاب والإحباط (الصحة العاطفية)
- حاسة بالوحدة والانعزال، بطلت تروح النادي وتقابل محيطها اللي كان يشجعها (الصحة العلاقاتية / الاجتماعية)
- حاسة بالفراغ لانها فقدت شي كانت تقضي معظم وقتها فيه فبدات تتسائل عن معنى او تبحث عن معنى اخر (الصحة الوجودية)
- المثال 2: سيدة تشتغل ساعات طويلة في وظيفة تسبب ضغط نفسي كبير. وظيفة مكتبية (تؤثر على صحتها البدنية بسبب الخمول وآلام الظهر والرقبة)، وماتنام كفاية (تأثير إضافي على الصحة البدنية). وبسبب هذا الموقف حاليا بتمر في :
- قلق وتوتر، ترد على الاميل في وقت متأخر من الليل وطول الوقت حول جوالها (الصحة العاطفية)
- مشاكل مع شريك حياتها بسبب الإفراط في العمل - بترجع متاخر من دوامها وطول الوقت مشغوله (الصحة العلاقاتية / الاجتماعية)
- مكتبها او الدوام تبعها مغلق و مافيه اضائة شمس، كل اكلها طلبات من برا او الكفتيريا ( كروسونات ومعلبات ) لانو هيا اقرب شي لها (الصحة البيئية)
- حاسه ان عمرها ضاع وهيا ماسوت شي مفيد لنفسها (الصحة الوجودية)
-
والآن... خلينا نجي للجزء الممتع: واللي هيا كيف حساعد كل سيدة. وقيسي نفسك عليهم.
المشكلات لو ملاحظين متصلة ببعضها... ولكن الحلول متصلة ببعضها ايضا .
المعاناة في جانب واحد من جوانب الصحة العميقة تعني عادةً المعاناة في الجوانب الأخرى.
لكن فيه جانب إيجابي: تحسين جانب واحد يمكن أن يحسن الجوانب الأخرى.
هذي قوة التدريب على الصحة العميقة.
- الحل للمثال 1: اساعدها على أنشطة بديلة وإدارة الألم الذهني. على سبيل المثال، لفترة من الزمن اقترح لها تتوجه الى الرياضات المائية أو السباحة، اساعدها على تقبل الإصابة كأمر طبيعي وتركز على العلاج الطبيعي وتاخذها فترة استفاء ونقاهة. هنا حترجع تتحرك وتحس بسعادة اكبر _ ملت وقت فراغها -غيرت جو واتعرفت على اشخاص جدد . حياتها رجعت اتملت ومهي حاسة بالفراغ زي زمان
- الحل للمثال 2: اديها تقنيات للاسترخاء والتقليل من التوتر ( التنفس - البعد عن الاجهزه زقت النوم - شرب المشروبات الدافئة والمهدئة ) ، وتمارين مرونة خفيفة لرقبتها وظهرها او روتين بسيط تعمله وقت دوامها حتى تتفادى التيبس، ممكن اساعدها تحظر وجباتها ( يوم واحد في الاسبوع تحضر فيه وجبات 4-5 ايام ) او بدل ماتطلب من المطاعم المحيطة او بتاكل اي شي من دوامنها ارشحلها احد المطاعم الصحية، انصحها تكسر جلوسها المتواصل وتتحرك اثناء البريك وترتب وقتها على انها تتمرن . العادات هذي تخليها اقل توتر واكثر تركيز بالتالي حتنتج اكثر في عملها. النتيجة حترجع من دوامها بدون ماتشتغل ساعات اضافية في المنزل.. هنا سارت تلاقي وقت مع شريك حياتها بالتالي المشاكل قلت. شايفين كيف الخطوات الصغيرة تعمل فرق كبير ! وقيسي عليها.. اي مشكلة بتعاني منها فحياتك اذا صلحتيها حتلاقي 10 مشاكل بعدها اتصلحت
المقالة القادمة حتكون عني.. عن كيف دخولي للحياة الصحية غيرني تماما
كيف تبدأي؟ كيف تحاوري نفسك؟ (دليل الحوار وطرح الأسئلة)
هنا حعطيكي دليل يساعدك تبدأي. اعملي نسخ للملف عشان تقدري تعدلي عليه
