خليني احكيكم قصة سارت معايا
أنا وصحبتي “ البست فريند” على نفس الجدول الرياضي وماسكين دايت من سنين (دايت لا يعني حرمان قد ما انه بنحاول نمشي على رينج سعراتنا ونقفل احتياجنا من البروتين)، مستوانا متقارب ونسبة العضل عندنا ماشاء الله عالية نسبتا لاوزاننا، نسبة دهوننا أقل من 20%.
- هذي قياسات جسمي على اخر انبودي عملته :
- هذي قياسات جسمها على اخر انبودي عملته :
طلعنا يوم سوا وسوينا نفس البرنامج بالضبط،
ولاحظت إنها أبطأ وأهدأ مني بمراحل، بينما أنا حركتي مستمرة حتى وأنا جالسة.
في البداية كنا محسبين "بس طبايع مختلفة" لكن مع الوقت فهمنا ان الفرق أعمق والطلعة هذي اعطتنا سبب منطقي لاختلاف تكوين اجسادنا رغم تشابه عاداتنا ( طبعا التشكيل الجسدي + حجم العظام ليه دور ) ولكن….
- أنا أواجه صعوبة في بناء العضلات لكن خسارة الدهون المرحلة الأكثر سهولة.
- هي بالعكس: تبني عضلات بسرعة، لكن خسارة الدهون عندها أصعب.
سلوكنا النفسي:
- أنا أكثر قلق وعندي اضطرابات في النوم، وهي أهدأ مني بكثير ونومها أفضل ماشاء الله
معقولة المسألة أبدا مهي جينات؟
فيه جين اختصاره FTO مرتبط بالسمنة، بس تأثيره الأساسي على الشهية مو على الحرق مباشرة، زي لمن تشوفوا احد عنده حب للاكل والطعام الدسم او خلينا نقول شهيته مفتوحة، هنا يكون معرض للسمنة اكثر من الشخص اللي شتهيته منظمة.
طيب فلنفترض ان البني ادمي فعلا عنده جين مرتبط بالسمنة؟
الفرق الفعلي بالوزن حوالي 3 كيلو بالمتوسط فقط. يعني السمنة غالبًا سببها عادات مو جينات، والنشاط والبروتين وإدارة الشهية يلغوا جزء كبير من هالتأثير.
ايش الفرق القابل للقياس؟
الفرق الأكبر بيني وبين صحبتي ما طلع من الحرق الأساسي أو عمليات الايض (جسمها مدرب وعندها كتلة عضلية عالية + تكوين جسدها متقدم بالتالي مستحيل عمليات الايض عندها ضعيفة ماشاء الله)
طلع من شي اسمه NEAT (Non-Exercise Activity Thermogenesis)، وهي الطاقة اللي يصرفها جسمك من الحركة الغير رياضية:
- تغيير الجلسة، الوقوف بدل الجلوس، إيماءاتك وانتي تتكلمي
- خطواتك خلال اليوم وحركتك العامة هل انتي نشيطة ولا اغلب وقتك جالسة
في دراسة عملوها لأشخاص متشابهين من ناحية الوزن والعمر والجنس، خلوهم ياكلوا زيادة كبيرة عن احتياجهم لأسابيع، وبدل ما يكتسبوا وزن متقارب، بعضهم اكتسب وزن قليل وبعضهم أكتسبوا وزن عالي بنفس الأكل بالضبط.
الدرس المُستفاد من قصتنا؟
- أنا الـ NEAT عندي مرتفع تلقائيًا ( بسبب جهازي العصبي - شخصيتي وسلوكياتي - اسلوب حياتي - والخ )
- صحبتي عكسي تمامًا جسمها أميل للتخزين والبناء ( بسبب جهازها العصبي - شخصيتها وسلوكياتها - اسلوب حياتها - والخ )
هل هذا قدر محتوم؟
لا. الهدف من فهم هالفروقات مو الاستسلام لها، إنما إنك تفهمي ليش برنامج موحّد يفترض إن كل الأجسام تتفاعل بنفس الطريقة غالبًا يفشل، وتبني استراتيجية تراعي طبيعة جسمك بدل ما تحاربيها.
أنا شخصيًا، لمن اتشخصت باضطرابات النوم اشتغلت على نومي وإدارة توتري، وقطعت الكافيين تمامًا لمدة سنتين.
تقبلت إني أحتاج فترة أطول من غيري في بناء العضلات.. بعيدا عن الوقت انما مجهودي كان اكبر - التزامي في الدايت كان أكبر ولو ما التزمت مافي عضلات حتنبني- اوزاني كانت اعلى وتعبي في التمرين اشد ولو التمرين ماكان فيه زيادة تدريجية ؟ جسمي حيحول السعرات اللي باكلها دهون
في البداية كنت اشوف الموضوع غير عادل وكنت دائما انتقد جيناتي (تجمع الدهون في البطن - سكيني فات - جسم مثلث مقلوب)،
جيناتي اللي اجبرتني التزم “ ولا وقتها ماكنت حشوف نتيجة ” فادتني حتى في تدريبي.. سرت ادرب باهداف مختلفة وبثقه اكبر لاني كنت فار التجارب لنفسي وبفضل الله قدرت اتحدى جيناتي وعملت تحول شامل في تشكيلي الجسدي وقوتي ماشاء الله. سرت اقول اذا انا هذي جيناتي ولقيت فرق. كيف لو سيدات ثانية تشكيلها الجسدي وتوزيع دهونها الجيني افضل مني؟
ولكن اللي حيوصل لهدفه في النهاية هوا المجتهد، الجينات ممكن تساعدك بس مو هيا السبب
لاني بطلت اقارن نقاط ضعفي في نقاط قوة غيري قدرت اركز على امكانياتي واخرج اجمل مافيا،
حاليا سرت اتباهى باكتافي لانها بتعطيني منظر واثق وكاريزما وعمري ماحبطل امرنها.. سرت اتباهى بجزئي السفلي واقلهم “ حبايبي هذي مو جينات هذا عرق جبيني بفضل الله”.. الان اللي يشوفني فوضعي الحالي يقول اني محظوظة جينيا وهنا كيف افهمهم اني دعكت الارض 😂🤷♀️
وماننسى صحبتي. كانت تعاني من السمنه وحاليا باجتهادها وبعد مرور 4 سنوات من الاتزام ( لو مركزين 4 سنوات مو 4 شهور ) حاليا وصلت لنتيجة مبهرة ماشاء الله وقدرت تتغلب على الصعوبات اللي فرحلتها واللي ماذكرتها فهذا المقال…
فيه عبرة اضافية وهيا ان رغم تشابه جداولنا. طلعنا بأشكال أجسام مختلفة لان بكل بساطة هيا تكوينها الجسدي الجيني وحجم عضمها مختلف عني.
من الاخير، لو لسا فيه جسم معين فبالك نفسك توصلي زيه بالضبط جايه اقلك خففيها على نفسك وركزي انك تكوني اجمل نسخة منك مو نسخة تشبه احد ثاني لانو ماحتسيري زيها حكم الفروقات الكثير.
الخلاصة
لمن تحطي في بالك إن شي أحسن من ولا شي:
- إذا انتي بتعاني في الطعام، يصير هذا التحدي تبعك كيف تلتزمي أو تقفلي احتياجك من البروتين. خمسة أيام قفلتي فيها احتياجك من البروتين، مقابل يومين ما قفلتيها، انتي في تقدم.
- خمسة أيام اتحركتي، مقابل يومين ما اتحركتي، انتي في تقدم، وإذا عندك مشاكل في الحركة أو مشكلة تمنعك، هنا تضطري تعالجي المشكلة عشان تقدري تتحركي بسلاسة.
الكل بيعاني من ظرف مختلف وانتي بيدك قادرة تعملي الفرق ايش ماكان وضعك الحالي.
ممكن ما عندك أي مشكلة جينية أصلًا، وعمليات الأيض عندك ما تشتغل بكفاءة بسبب الدايتات الكثيرة أو قلة حركتك اليومية بدون ما تحسي. هنا تحتاجي تغيّري عاداتك عشان تبدي في إصلاحها فعليًا.
ليان الشريف متخصصة في إصلاح عمليات الايض واستعادة الحرق
