احد المشاكل الشائعة المتكررة اللي تجيني في الخاص هيا
"ليان، شعري بدأ يطيح، دورتي اتأخرت أو وقفت..
فيه رسالة جسمك حاول يوصلك إياها من أشهر وأنتِ ما سمعتيها.
جسمك مو مريض، جسمك بيتكلم… حاولي تسمعيه
لما يحصل عندك تساقط ملحوظ في الشعر، شحوب في البشرة، طاقتك نازلة، اخلاقك قافله وتعاني من تأخر أو انقطاع واضطراب الدورة الشهرية في نفس الوقت، هذي مو مصادفة. ومو "تعب هرموني مجهول". هذا قرار مدروس ودقيق جداً اتخذه جسمك بناء على معلومات موجودة عنده.
الجسم عنده نظام إدارة أزمات فطري.
لما يحس بأن الطاقة اللي داخلة مو كافيه سواء بسبب كالوري منخفض، أو ضغط عالي، أو نوم ناقص، أو الثلاثة مع بعض.
يبدأ يصنّف الوظائف في جسمك:
- خانة "ضروري للبقاء": ضربات القلب، وظائف الدماغ، ضغط الدم، تنظيم درجة الحرارة.
- خانة "كماليات يمكن تأجيلها": نمو الشعر، تجديد البشرة، الدورة الشهرية.
الجسم ما يكره شعرك، او يبغا يأثر على هرموناتك بصورة شخصية. هو ببساطة يوفّر الطاقة للعمليات الأكثر أهمية زي انك "تعيشي".
ليش اول شي يتأثر شعرك ودورتك الشهرية تحديداً؟
لأنهم من أعلى وظائف الجسم استهلاكاً للطاقة.
دورة شهرية صحية تحتاج هرمونات، وهذه الهرمونات تحتاج دهون كافية في الجسم، ومحور هرموني يشتغل بشكل سليم. لما الجسم يحس بندرة الطاقة، أول شيء يعمله هو إيقاف إشارة الإباضة. فكري فيها كذا هوا جسمك يلا قادر يغذيكي، هل عنده الطاقة الكافية لاستقبال طفل جديد ؟ اكيد لا هنا اللعبة حتوقف قبل ماتبدأ
- والنتيجة: دورة شهرية متأخرة، خفيفة، أو مختفية تماماً.
نفس الشيء للشعر. دورة نمو الشعر تحتاج بروتين وحديد وطاقة مستمرة. لما المصادر تكون شحيحة وعايشة على الف سعرة، الجسم يوقف الاستثمار في البصيلات ويحولها لأولويات ثانية.. صدقيني جسمك مو مهتم لجمال شعرك هنا يباكي تعيشي بصورة سليمة.
نرجع لموضوعنا..
الشعر اللي توقف نموه او المغذيات بطلت توصله بصورة جيده يبدأ يتساقط بعد ٣-٦ أشهر من اللحظة اللي فيها الجسم اتخذ هذا القرار وهذا يفسر ليش كثير سيدات يربطوا التساقط او اضطراب الدورة الشهرية بظروف الفترة الأخيرة اللي مروا فيها فحياتهم..
- لكن في الغالب الجسم كان ليه شهور بيعاني من نقص واخيرا ظهرت نتائجه، يعني الموضوع مهو فيوم وليلة.
"لكن الدكتور قال كل شيء طبيعي" هذي جملة تسمعيها كثير، وتحتاجي تفهميها صح.
الطبيب يبحث عن مرض معين مثل قصور الغدة الدرقية، متلازمة تكيس المبايض، فقر دم، اضطرابات مناعية. لما ما يلقى شيء من هذا يقول "طبيعي". وهو صادق من زاويته الطبية.
لكن "غياب المرض" مو نفسه "صحة كاملة".
فيه حالة طبية معروفة اسمها نقص الطاقة النسبي، وهي بالضبط اللي يوصفها هذا المقال. بس غالباً ما تظهر في تحليل واحد، لأن ما فيه رقم يقول لك "هذي السيدة تاكل أقل من احتياجها بكثير من سنة". لكن جسمك يعرف والأعراض اللي تشوفيها هي النتيجة.
من فين يجي هذا الضغط على الجسم؟
الصورة الشائعة هي: بنت عانت من دايت قاسي لفترة طويلة، كالوري قليلة جداً، وتتساءل ليش جسمها "مو قاعد يتجيب".
لكن الحقيقة أن الجسم يمكن يدخل نفس الوضع الدفاعي من أكثر من طريق:
- السعرات المنخفضة لفترة طويلة : هنا ما اتكلم عن نقص لمدة أسبوع عشان سافرتي ولا عندك اختبارات أو ظرف خاص، نتكلم عن أشهر من قلة الأكل. ايضا كثرة استهلاك الكافيين يسبب جفاف ونقص في امتصاي الحديد ( مو هوا المشكلة لكن احد العوامل )
- الضغط النفسي الحاد: الكورتيزول المرتفع يلخبط عمل الهرمونات. جسمك ما يفرق بين ضغط نفسي وضغط جوع من حيث الاستجابة.
- النوم الناقص: أقل من ٧ ساعات بشكل مستمر يرفع الكورتيزول، ويخفض هرمون النمو، ويضغط على الغدة الدرقية.
- التمرين المفرط مع أكل ناقص: التمرين وحده ما يسبب المشكلة، لكن لما تجمعي تمرين شديد مع طعام غير كافي تحصلي على نتيجة عكسية، لان التمرين اساسة هوا ( الهدم ) وبعدها تصلحي وترممي بالغذاء والراحة، اذا مابتاكلي ومابترتاحي كيف متوقعة جسمك يستجيب؟
في الغالب، الحالات اللي أشوفها هي مزيج من اثنين أو ثلاثة من هذي مع بعض.
كيف تعرفي إذا هذا هو سببك؟
اسالي نفسك..
قضيتِ فترة طويلة تحاولي تخسري وزن؟ هل فيه فترات أكلتِ فيها قليل جداً؟ هل مستوى ضغطك في الحياة عالٍ بشكل مستمر؟ هل تنامي بانتظام وبعمق؟ شعرك بدأ يتساقط بشكل غير طبيعي؟ دورتك منتظمة أو اختفت؟
إذا أجبتِ بنعم على أكثر من سؤالين أو ثلاثة، الجواب موجود.
الحل مو في كبسولة كثير بنات تجيني بعد ما جربوا حبوب الحديد، وبيوتين، وكولاجين، وزيت الخروع، وكل شيء موجود في السوق. والشعر ما توقف يتساقط.
لأن المشكلة مو في الشعرة نفسها. المشكلة في الرسالة اللي الجسم بيرسلها… المكملات اللي بتاخذيها او الزيوت اللي بتحطيها لابد منها لكن مو هيا اللي حتحدث الفرق معاكي..
اللي جسمك يحتاجه فعلاً:
- طعام كافي وحقيقي: مو كالوري بس، بروتين ودهون وكاربوهيدرات بنسب تدعم الهرمونات وتطمّن الجسم إن الطعام موجود ( حتتخفيلي كافيين وزيوت مهدرجة واطعمة تحفز الالتهابات زي السكريات)
2. وقت: إصلاح الهرمونات يحتاج وقت وصبر. يحتاج تستثمري وقت في اختيار وجباتك ووقت في التمرين تبعك
- تخفيف الضغط اليومي
- نوم عميق وساعات كافية
الرسالة الأخيرة
تساقط شعرك وتأخر دورتك مهي خيانة من جسمك. هو بيحاول يحميكي.
جسمك يقلك بصدق تام: "أنا أحتاج أكثر من اللي تعطيني هوا عشان أعطيكي أكثر."
سؤالي لك كالتالي: هل حتسمعي لجسمك؟
ليان الشريف متخصصة في إصلاح عمليات الايض واستعادة الحرق
