"جسمي عنيد" "كل الناس ينزلون وأنا واقفة في نفس الرقم" "أعطيت جسمي كثير وحاولت… بس خذلني"

كم مرة قلتي هالجمل لنفسك؟ لاني سمعتها كثير في مكالماتي

الجهد اللي بذلتيه حقيقي والإحباط حقيقي وأنا أفهمك، لكن حرجع اذكرك مو كل مجهود او سعي ممكن يخدمك. هنا حقلك كلام يغير وجهة نظرك تجاه جسمك

جسمك ما يعرف إنك ماسكه دايت

جسمك ما يقرأ خطتك الغذائية. ما يعرف إنك حابه تنزلي 5 كيلو قبل العيد ولا 10 كيلو قبل فرح أختك. ما يفهم مفهوم "الدايت" أصلاً. اللي يفهمه هو إشارة واحدة فقط: هل الطاقة الداخلة كافية للبقاء؟ عنده طاقة عشان ( تعيشي ) ؟ عشان ينظم هرموناتك ويهضم اكلك ويدفك للحركة..

  • إذا الجواب "نعم" كل شيء يشتغل بشكل طبيعي.
  • إذا الجواب "لا" يدخل في وضع الطوارئ. وأول قرار يأخذه انه يحتفظ بالموجود ومن ضمنها الدهون بالتالي يقلل الحرق عندك .

الدهون مهي عدوة لك، هي صندوق الطوارئ

طريقة تفكيرنا في الدهون انها شيء زائد، غلط، ولازم ننتخلص منها باسرع وقت

لكن جسمك يشوفها بعين مختلفة تماماً.

الدهون بالنسبة له هي احتياطي الطاقة. لما تحرمي جسمك من الطعام سواء بكالوري منخفض جداً، أو وجبات ناقصة، أو فترات جوع طويلة، رد فعله مو حرق الدهون. رد فعله الأول هو حماية الدهون وتقليل الحرق الكلي.

لأنه ما يعرف متى راح تيجي الوجبة الجاية.

ليش الـثبات يصير؟

ثبات الوزن أو ما يسمى الـ Plateau يمشي بهذي الصورة:

  1. تبدأي دايت، تقللي السعرات، ينزل الوزن في الأسابيع الأولى. جسمك يلاحظ التغيير، يبدأ يضبط معدل الحرق ليتناسب مع الكمية الجديدة من الطعام. بعد أسابيع، يستقر الوزن.
  2. كثير سيدات في هذي اللحظة يعتقدوا الحل هو تقليل الكالوري أكثر. فيقللوا أكلهم.
  3. جسمك يتكيف مرة ثانية ويخفض الحرق أكثر.
  4. ويدخلوا في دوامة تقليل لا تنتهي، مع عمليات ايض تشتغل بأقل طاقة ممكنة.
  5. هذا ما يسمى ( التكيف الأيضي - Metabolic Adaptation ) واللي اتكلمت عنه كثير في مقالاتي او حلقاتي في اليوتيوب… وهو السبب الحقيقي وراء "جسمي ما يستجيب".

الجسم اللي يحرق والجسم اللي يخزّن

في جسمك حالتين:

حالة الأمان:

جسمك مطمئن إن الطعام موجود وكافي، الكورتيزول منخفض، معدل الأيض يشتغل بكامل طاقته، بالتالي الجسم مستعد يتخلى عن الدهون لأنه مو خايف منها.

حالة الطوارئ:

جسمك حاسس بعدم وفرة أو تهديد، هرمون الكورتيزول مرتفع. الجسم يقلل الحرق و يحتفظ بالدهون.

المشكلة أن معظم السيدات يحاولوا يخسروا وزن وجسمهم في حالة الطوارئ.

والنتيجة إرهاق، وتوقف في الوزن، وإحساس بالفشل مع إن الجسم يشتغل بشكل صحيح ( لكن يحتاج خطة مختلفة ) .

وهنا اواجه تحدي في مكالماتي الاستكشافية، لمن سيده كانت في عجز سعرات خسرت فيه وزن كبير وبعدها وزنها رجع زي ماكان او اكثر وأحاول افهمها ان ماينفع ادخلها في عجز سعرات ثاني لان النهاية حتكون فشل.. عجز السعرات مهي خطوة مثالية لجسم مرهق لانك هنا جالسة تمشي ضد طبيعة جسمك ( عجز السعرات فترة حساسة للجسم )، بدون ماتبني عادات صحية وبدون ماتتعلمي التوازن وبدون ماتبني عمليات ايض فعالة، عجز السعرات حيزيد من اجهادك

محاربة الجسم تجيب عكس النتيجة المرادة

  1. كل ما زدتِ الحرمان، زاد جسمك في الدفاع.
  2. كل ما قللتِ الأكل أكثر، قلّ الحرق أكثر.
  3. كل ما أرهقتِ نفسك بتمرين مع سعرات اقل، قلّت العضلات وتراجع الأيض.
  4. لما تحاربي جسمك، ما رح تكسبي. لأنه مصمم على البقاء وعنده آليات دفاع أقوى من أي خطة دايت.

إذا جسمك في وضع الطوارئ، مو المفروض تزيدي الضغط عليه المفروض تطمّنيه. ( في مقالة تأهيل الأيض: ليش دخولك لنوع جديد من الدايت ماهو الحل) تم شرح كيف تخرجي من وضع الطوارئ وتعيدي تأهيل أيضك

اللي حيحصل معاكي لمن جسمك يحس بالأمان ؟

لما جسمك يثق إن الطعام موجود، ومو في خطر، وإنك ما رح تحرميه مرة ثانية يبدأ يتصرف بشكل مختلف تماماً.

يرتفع معدل الحرق. تتحسن جودة النوم. تنتظم الدورة. ينخفض الكورتيزول. وتبدأ الدهون تتحرك وثبات الوزن ينكسر وبشكل مستدام.

الخلاصة

جسمك مو عدوك و دهونك مهي عنيدة او أيا يكن..

هو يبغى مصلحتك ويحاول يحميكي. النجاح الحقيقي ما يجي من الألم والإجبار. يجي من فهمه، ومصادقته، وإعطائه اللي يحتاجه.

وهذا هو الفرق بين سيدة تكافح مع وزنها لسنوات، وسيدة تلاقي نتائج تعبها.

​ليان الشريف | Build with Protein متخصصة في إصلاح عمليات الأيض واستعادة الحرق