هنا ما حوعدك بخسارة وزن كبيرة في 30 أو 60 يوم بنوع دايت معين. بقولك العكس: اللي أقدمه لك بياخذ شهور، وبعض الأحيان سنين. بس هو الطريق الوحيد اللي ما ترجعي منه لنقطة الصفر. وبقولك كيف خليت متدرباتي ينزل خصرهم وهم يأكلوا أكثر، بدون يوم مفتوح وبدون حرمان.​

YouTube video thumbnail
كيف وصلت لنسبة دهون أقل من 19% بدون دايت ؟

ليش نظام مو دايت

لاحظتي في العنوان إني ما قلت "دايت يخليكي تستمري"؟ قلت نظام. يعني ما راح تلاقي هنا نوع دايت جديد. ليش؟

لأن الدايت شي مؤقت، وأي شي مؤقت ما يوصّلك لهدفك. اللي تحتاجيه إنك تستمري على شغلة معينة لفترة من الزمن وتبني عادات، والعادات تتراكم يوم بعد يوم، ومع الوقت تلاقي نفسك وصلتي لهدفك.

فكري في آخر ١٠٠٠ وجبة

خذيها قاعدة: آخر ١٠٠٠ وجبة لك، كيف كان شكلها؟ وآخر ١٠٠٠ ساعة فراغ ايش عملتي فيها؟ غالباً هذا يعبر عن وضعك الحالي، عن شكل جسمك وعن أسلوب حياتك.

يعني ما تتوقعي إنك تاكلي وجبتين صحيين اليوم وتوصلي لهدفك بكرة، أو تتمرني يومين وبعدها تقولي "ما في نتيجة". خففيها على نفسك، الأمور ما تمشي بهالطريقة.

وأفهم إن بعضكم ماسك دايت وتعبان وملتزم ومع ذلك مو لاقي نتيجة. لأن الحرمان مو الحل، الحل كيف تقدري تكملي على اللي أنتي فيه بدون معاناة. غالباً دخلتي في دوامات كثيرة من الحرمان، وقفتي، وبعدها دخلتي في دايت جديد.

في هالمقالة بقولك كيف تاكلي هذي الألف وجبة بدون ما يكون عليكي شي صعب. بالعكس، بتتعلمي كيف تخلي هالوجبات ممتعة، وكيف تخلي رحلتك متوازنة بعيد عن ألم الدايت والحرمان.

ليش الحلول السريعة ما توصلك

غالبية الحلول السريعة، مثل تحدي خسارة الوزن في 30 يوم أو إبر التخسيس، هي حل مؤقت. وبعدها يجي يوم النهم والشراهة، أو حرمان حرمان لين آخر الأسبوع، تديها يوم مفتوح، ويروح تعب الأسبوع كله.

فنرجع لنفس النقطة: ما في استمرارية، ما في هدف توصليه. فيه استمرارية، فيه هدف توصليه.

ولما أتكلم عن الاستمرارية أقصد شهور، وبعض الأحيان سنين. الكل متعود يوعدك بخسارة الوزن السريعة، وقليل اللي يقولك إن الموضوع بياخذ وقت. بس عشان نكون إيجابيين، هنا نسرّع وصولنا لهدفنا: اعتبري هالمقالة أسرع طريق صحي للوصول لهدفك، واللي بيحسّن كفاءة عمليات الأيض عندك بصورة فعالة بإذن الله. لأن أول شغلة لازم تحطي عينك عليها هي الطعام.

متدرباتي خصرهم جالس ينحف وهم يأكلوا أكثر، وبدون ما يستنوا يوم مفتوح. لأنهم أصلاً مبسوطين على نظامهم الحالي، فمو مستنيين اليوم اللي يفكوا فيه من وجباتهم. وصلوا لأهدافهم وقياساتهم بدون دايت وبدون حرمان، وما في عندهم دجاج ورز ناشف.

وأنتي تسألي: معقول؟ لك سنين في المجال الصحي، وأنتي كوتش، وآخرتها أنتي ومتدرباتك مبسوطين في الأكل وتلاقوا نتيجة؟ بكل بساطة لأن لا أنا ولا متدرباتي ماسكين دايت بصورة فعلية.

قصتي مع الأكل

أغلبكم جاي من حسابي حق الوصفات "بيلد ويذ بروتين". وإذا ما تعرفي حسابي، هو موجود لأن إرادتي ضعيفة قدام الطعام. فشلت إني ألتزم بالدجاج والرز الناشف، وحتى ما جربت آكلهم في بداياتي، من كثر ما الفكرة كانت مرعبة. وهذا اللي خلاني أبدأ أطبخ وصفات "كأني بخبّص فيها"، عشان أعطي نفسي شعور المتعة.

خلينا نكون صادقين مع بعض: الأكل أكثر من مجرد منطقة تشبع البطن. هو منطقة مريحة، ومنطقة تواسينا بعد يوم متعب ومجهد، أو حتى بعد يوم مفرح نبا نكافئ فيه نفسنا. وكان صعب علي أتخلى عن كل هذا. ومنها جاء كتيب "كأنك بتخبّص": الوصفات اللي كنت أسويها لما أحس إني أبا أخبص، وفي نفس الوقت كان عندي رغبة عارمة إني أوصل لجسم أحلامي.

وهذي الأساليب اللي خلتني أقدر أستمر ووصلتني لهدفي.

القاعدة الأولى: تحكمي في الشهية

أول أداة تضبطك وتوصّلك لهدفك هي التحكم في الشهية. ياما ناس جاتها خطط جاهزة وما قدرت تكمل، لأن شهيتها كانت أقوى منها.

ومو جاية أقولك قاومي شهيتك واقمعيها. بالعكس، هنا بتقدري توازني. الهدف لا إفراط ولا تفريط، إنما التوازن.

أي شي يحفّزك على سدّ الشهية بيشتغل ضدك، ومنها إبر التخسيس. ليش؟ لأنك بتعاني من نقص المغذيات، وبالتالي مشاكل هرمونية وصحية وضعف عام، وخلل في الصحة الأيضية، واللي غالباً بيخلي جسمك ما يستجيب لخسارة الوزن بصورة سليمة.

وفي المقابل، في أشياء ترفع الشهية عندك:

الحرمان من الأكل لفترات طويلة يلخبط هرمونات الجوع والشبع.

قلة النوم والتوتر، والسبب هنا هرموني، يعني مو بيدك.

الضغط النفسي والملل، وهنا تدخلي في الأكل العاطفي.

الإكثار من السكريات: لو لاحظتي، الفترة اللي تاكلي فيها حلى كثير تلاقي نفسك دايماً تدوري على حلى ثاني وتدخلي في حلقة ما تنتهي. ورحلتك تكون شاقة لأنك في صراع مستمر مع الحلويات، واحنا نبا نوصل للتوازن.

١. البدائل

بدل الحليب كامل الدسم رحت لقليل الدسم، واستبدلت الحليب الحيواني بالنباتي، وبدل ما أصب زيت الزيتون صرت أرشّه بالبخاخ. وإذا طلعت المطاعم أطلب أعلى وجبة فيها بروتين. وغيّرت المقلي بالمشوي، والخبز الأبيض بخبز البر أو الحبوب الكاملة. وهذا مو موضوع سعرات،

٢. لا تخلي جسمك يطلب الأكل

دايماً أقولها قاعدة: حرمتي نفسك؟ جسمك بيطلب الأكل بطريقته. وقفتي الكارب؟ بيجيك نهم. سكبتي الفطور؟ الجوع آخر الليل بيشتد عليك، كأن جسمك يقولك "ما أكلتي الصبح، عوّضيني في الليل". وأكل الليل غالباً هو الأكل العاطفي، اللي يجيب العيد ويخرب التزام يومك.

الحل: شبّعي نفسك.

جملة أحب أقولها: تغدّي على جسمك قبل ما يتعشى فيكي. جهزي وجباتك في أوقات معينة، وكليها وأنتي مو مرة جيعانة. لا تأجلي الأكل لحد الجوع الشديد، لأن وقتها قراراتك بتكون غير عقلانية، وبتاكلي أي شي قدامك أو تطلبي من أقرب مطعم.

أنا عادة أعملها يوم الجمعة. كلكم عارفين، يوم الجمعة فيه تخبيص مو عادي. فأسوي فطوري وأشبع كويس، وأغطي كمية كويسة من البروتين، بحيث لما تجي العزايم والخرجات والحلى قدامي أكون أصلاً شبعانة ومو مشتهية هالأشياء. كأني ألحق نفسي قبل ما أخبّص.

٣. الأكل الحجمي

يعني أكل حجمه كبير وسعراته قليلة. ساعدني كثير في فترة التنشيف، وكانت صعبة عليا جداً لأني أحب الأكل. مع إن التنشيف فترة معينة من رحلتي مو كلها: من أربع سنين، ست شهور بس منها كانت تنشيف.

كنت آكل سناكات حجمها كبير وتشبّع وسعراتها قليلة، مثل الفشار. بدل شيبس بحجم صغير وبعدها أدور على سناك ثاني، سوّي فشار بنفس السعرات بس كميته أكبر. وصدقيني، لو أكلت الشيبس ضمن سعراتي في التنشيف ما كان بيأثر على وزني، بس كان بيخليني لسا جيعانة وأفكر في السناك اللي بعده.

وفي أمثلة ثانية: صرت أستخدم بياض البيض، يشبعني ويسد شهيتي وأقدر آكل منه كميات كبيرة بسعرات أقل. ولما أشتهي شي حامض زي ورق العنب كنت أعمل سلطة حامضة تعطيني نفس الشعور تقريباً. وقيسي عليها في البدائل. وعندي كمان آيس كريم صحي بالزبادي اليوناني، تقدري تاكلي منه كميات كبيرة بسعرات أقل. وصدقيني، الأكل الحجمي يفك أزمة الجوع العاطفي، لان احيانا نبا بس نحرك فمنا ونشغل نفسنا اكثر من انو مشتهيين شي معين.. الأكل الحجمي حيفكلك ازمة من ذي الناحية.

القاعدة الثانية: احسبي سعراتك

هذي الشغلة اللي محد يحب يسمعها، بس أنا بقولها لك من الآخر: في بدايتك، أول 6 إلى 9 شهور من دخولك الحياة الصحية، لازم تحسبي سعراتك.

كثير ناس يشوفوا حساب السعرات تعقيد، أو صار عندهم خوف منه. أنا جاية أصحّح لك المعلومة هذي. إذا كنتي خايفة تحسبي، فالسبب واحد من اثنين:

إنك أصلاً ما تاكلي كفاية. يعني ماشية على 900 سعرة. المشكلة هنا مو في السعرات، المشكلة إن الرقم اللي تاكليه قليل جداً.

إنك ما تبي تحسبي عشان ترتاحي. تبي تاكلي وضميرك مرتاح. وهذا النوع بالنسبة لي أصعب، لأنهم لا ملتزمين ولا راضيين باللي هم فيه، وتلاقيهم متضايقين وفي حالة سخط دائم“ليش ما لقينا نتيجة”.

الحقيقة حساب السعرات غير دقيق 100%

من شخص لشخص يفرق. نفس الوجبة عند سيدة رياضية عندها عمليات أيض فعالة وحساسية إنسولين جيدة، بتستفيد منها أفضل، والأكل بيروح للكتلة العضلية بدل الدهون. والعكس صحيح مع سيدة ما تتحرك، ونظام أكلها مو أحسن شي، وعندها مقاومة إنسولين: جسمها ممكن ما يستفيد من الأكل بنفس القدر. وفي كمان التأثير الحراري للطعام: لو أكلتي بروتين جسمك بيحرق سعرات أكثر مما لو أكلتي دهون. شرحتها في فيديو "عوامل الحرق في الجسم"

طيب إذا اتفقنا إن حساب السعرات مو دقيق، ليش هو مهم في البداية تحديداً؟

١. يعلمك التوازن. يعلمك تاكلي على قد ما جسمك فعلاً يحتاج، لا أقل ولا أكثر. يعلمك الانضباط: متى تقولي لا، ومتى تقولي أيوه، ومتى توقفي عشان وزنك ما يزيد، ومتى تزيدي عشان ما تعاني من نقص المغذيات. والأهم من السعرات القيمة الغذائية: 1800 سعرة من شيبس وحلويات مو نفسها 1800 سعرة من أكل كامل يغطي احتياجك من البروتين.

المعادلة بسيطة: لو أكلتي أقل من احتياجك وزنك بينقص، لكن كيف بيكون شكل جسمك وصحتك وعمليات الأيض عندك؟ هنا الماكروز لها دور كبير.

٢. يعلمك حقيقة السعرات كقرامات. غالباً أنتي تحسبي إنك تاكلي قليل. مثلاً ملعقة الطعام حوالي 15 جرام، وفي الليبل مكتوب إن الملعقة فيها 30 سعرة. أنتي خليتي الملعقة كأنها جبل، بدل 15 جرام أخذتي 30، فصارت السعرات الضعف.

٣. يعلمك إن الأكل الصحي مو شرط يوصلك لهدفك. فيه فرق بين أكل صحي وأكل هدفه خسارة الدهون، وهذا تخصصي أصلاً. كثير سيدات يجوني وأكلهم صحي ماشاء الله. بس لما نجي نحسب أكلهم، تلاقيها ترش زيت الزيتون على الأكل. الملعقة الكبيرة الوحدة فيها 100 كالوري، يعني رشّت تقريباً فنجان قهوة على الأكلة، وبعدين تستغرب: "ليش وزني واقف، وأحياناً يزيد مع إني آكل صحي؟" وحفنة المكسرات اللي أخذتيها وأنتي ماشية، على الماشي، فيها فوق الـ200 سعرة.

السؤال: ليش ما تواجهي حقيقة السعرات؟ تصالحي مع الموضوع. المشكلة مو في الأكلة نفسها، المشكلة في الوعي تجاهها. أنا شخصياً أكل أكل فيه سعرات عالية، بس أكون واعية إن سعراتها عالية، وباقي اليوم أحاول أسدّد وأقارب. مثلاً أنا عارفة إن المكسرات فيها سعرات عالية، ومع ذلك آكلها وأحبها وأشوفها مفيدة لي، وعمري ما حطيت لها حظر ولا خفت منها. لكن لازم آكلها بحكمة وضمن احتياجي.

ثلاث شغلات تعطيك المرونة

عشان أسهلها عليك، هذي ثلاث شغلات تلتزمي فيها، وهي اللي وصلتني لهدفي وبتساعدك تحققي المرونة:

١. امشي على رينج سعراتك

خليكي حوالين السعرات اللي المفروض تاكليها، واتبعي نظام الزقزاق: وزّعي سعراتك خلال الأسبوع. لو سعراتك 1800 في اليوم، يعني 12,600 في الأسبوع.

٢. التزمي بالبروتين

الدهون والكارب فيهم مرونة، بس لا تلعبي مرتين مع البروتين. لو في طريقة ثانية وصلتني لهدفي كنت قلتها لك، بس الشغلة الوحيدة اللي لقيت عليها نتيجة، عليا وعلى متدرباتي، إننا مشينا على رينج سعراتنا وغطّينا احتياجنا من البروتين.

جربت إني ألتزم بسعراتي فقط وما لقيت تطور ملحوظ. وجربت ما ألتزم لا بسعرات ولا بماكروز مع اني كنت بتمرن! وشكل جسمي اتراجع. ولو اكتشفت طريقة ثانية توصلك لهدفك بدون ما تقفلي احتياجك من البروتين بقولك لا تشيلي هم. لكن حالياً العلم والتجربة يقولوا إن البروتين أساسي في زيادة كفاءة عمليات الأيض وتحسين التكوين الجسدي.

٣. نظام 80/20

هذا النظام اللي بيخليكي ما تدوري على يوم مفتوح، وما يدخلك في النهم، ويساعدك تلتزمي وتحققي التوازن.

  • 80% من أكلك نظيف وتغطي فيه احتياجك من البروتين
  • 20% عادي: كلي الحلى اللي نفسك فيها.

أنا كنت زيك، شبس الفاميلي سايز كان ضروري لما أبا أتفرج على مسلسلي أو أسوي كوزي نايت. بس سيبيه وخذي الشي اللي على قد نفسك والحجم الصغير.

الآيس كريم: كورة أو كورتين بالحجم الصغير تكفي. لا تاخذي 3 كور، هذا مو توازن، هذا إفراط.

والـ20% مو ضرورية، هي موجودة بس عشان تمنعك من النهم والشراهة، وما تمنعك من حياتك الاجتماعية. يعني مو شرط تخبّصي فيها، تقدري تقفلي سعراتك بفواكه أو حبة موز مثلاً.

وبعد 6 شهور، ايش بيصير؟

لنفترض إنك طبقتي اللي قلته لك. بعد أول 6 شهور من حساب السعرات، جسمك بيبدأ يتحسن: حساسية الإنسولين تتحسن، وعمليات الأيض تتحسن. تخلّيتي عن عاداتك الغذائية السيئة وبنيتي عادات جيدة، وصرتي تلاقي بدائل صحية لكل شي، وتعرفي توازني، وتعرفي حقيقة السعرات. هنا أكلك مو زي زمان، ووعيك مو زي زمان، وشهيتك مو زي زمان.

وقتها ممكن تبدأي تخففي حذرك تجاه السعرات وتدخلي في التغذية الحدسية، يعني تعرفي الوجبة تقريباً كم سعرة فيها. وأصلاً بيكون عندك منيو وجبات خاص فيكي.

هنا حقلك كيف التغذية الحدسية حتجي معاكي: مثلاً رينج سعرات الوصفات اللي أعملها بين 400 و500، والبروتين فيها ما يقل عن 30 جرام. وصرت أعرف إن شريحة التوست فيها 70 كالوري، فشريحتين 140. والبيض البلدي، حجمه أصغر من العادي، فيه 50 كالوري للحبة، وآكل منه 5 حبات، يعني 250، ومع كم بخة زيت وزعتر 70 سعرة إضافية، يطلع 460. بس عموماً لما أقرّب الرقم أقول 450، ووقتها ما بتفرق معاكي الـ50 ولا الـ100 كالوري. أنتي هنا عملتي إدارة جدية وقوية لأكلك ولتوقعاتك.

لكل هدف ثمن

وعشان أكون صادقة معاكي، التغذية الحدسية بتكون جميلة جداً معاكي لو كان هدفك لايف ستايل: جسم صحي ورشيق ومتناسق. ممكن تشدي على نفسك فترة معينة، مثل فترة التنشيف، وبعدها تستمري على التغذية الحدسية. أما لو كنتي أكثر طموح وتبي جسد رياضي متقدم أو عضلات محددة، هنا بتكوني أكثر التزام في حساب السعرات والماكروز، وأكثر دقة في اختيار وجباتك.

بكل بساطة، كل هدف تحطيه، حطي قدامه ثمن لازم تدفعيه. وغالبية السيدات، زي ما ذكرت، يبوا يكونوا رشيقين، بجسم صحي ومرتب، وواثقين في نفسهم، وبالتالي النظام اللي قلته لك هو الحل المثالي.

وافتكري مرة ثانية: وصولك لهدفك بياخذ شهور وسنين. الصحة شي بيولوجي وما تقدري تشتريه. العضلات تاخذ وقت في البناء، والدهون تاخذ وقت لخسارتها، وهذي بيولوجيا وما فيه كود غش. الأمور اللي ذكرتها لك بتسرّع وصولك لهدفك بإذن الله، بس عامل الوقت أساسي، فاحرصي إن الرحلة تكون ممتعة ومستدامة. وصدقيني، الحل السريع هو اللي لحد الآن مخليكي في مكانك. لو من البداية بديتي صح كنتي اختصرتي على نفسك وقت كثير.

وإذا حبيتي تكوني من متدرباتي في برنامج ترميم الأيض واستعادة الحرق، تلاقي تفاصيل التقديم هنا:

​ليان الشريف متخصصة في إصلاح عمليات الايض واستعادة الحرق